Celfyddydau Gweledol - Plant y cymoedd

Celfyddydau Gweledig

Wedi’i dylunio a’i darparu gan ein Artist Preswyl, Anne Culverhouse Evans, mae Rhaglen Celfyddydau Gweledol Plant y Cymoedd yn cwmpasu dosbarthiadau celf, preswyl ac ysgolion haf, teithiau cyfnewid rhyngwladol a phrosiectau cydweithredol gyda mudiadau celfyddydol cenedlaethol a rhyngwladol fel Artes Mundi, Art & the Environment a’r Academi Frenhinol.

Trosolwg

Mae oriel Celf yn yr Atig Robert Maskrey, wedi’i churadu gan yr Artist Preswyl, yn ofod arddangos hygyrch yn Y Ffatri, Porth, ac yn llwyfan i artistiaid lleol, cenedlaethol a rhyngwladol rannu eu gwaith gyda’r gymuned ehangach, gydag arddangosfeydd yn cael eu cynnal bob mis. Mae Artist Preswyl Plant y Cymoedd wedi datblygu partneriaethau rhagweithiol cryf gyda mudiadau celfyddydol o fri ledled y DU ac yn rhyngwladol gan gynnwys Artes Mundi a Tate Exchange.

Mae ein rhaglen celfyddydau gweledol yn rhedeg ar draws Plant y Cymoedd. Mae ein dosbarthiadau celf i oedolion hŷn yn rhedeg ym Mhenyrenglyn, Pen-y-graig a’r Porth. Mae’r rhain yn grwpiau hwyliog nad ydynt yn canolbwyntio ar gelf yn unig, maent hefyd yn gweithredu fel lleoliad cymdeithasol ar gyfer oedolion hŷn a bregus a allai fod yn eithaf ynysig fel arall.

Yn ystod cyfnod cloi covid-19, benthycwyd iPads i gyfranogwyr y dosbarthiadau celf fel y gallent barhau i fynychu dosbarthiadau celf yn rhithwir. Roedd hyn yn golygu bod y grŵp yn dal i gael cysylltiad â’r byd y tu allan o leiaf unwaith yr wythnos.

Mae gan oriel Celf yn yr Atig amserlen orlawn o arddangosfeydd, yn amrywio o grwpiau Plant y Cymoedd i artistiaid lleol a chenedlaethol.

Yn ddiweddar rydym wedi llunio partneriaeth ag ACE Arts, i weithio ar y cyd ar brosiect o’r enw Explore Collective. Mae’n brosiect dwy flynedd a ariennir gan gronfa ‘Cysylltu a Ffynnu’ Cyngor Celfyddydau Cymru, gan ddod ag ystod o fudiadau creadigol ynghyd. Nodau’r prosiect yw rhannu technegau a phrosesau artistig a dysgu sgiliau creadigol newydd, ynghyd â chynnig teithiau a threfnu arddangosfeydd a fydd yn helpu cyfranogwyr i gysylltu a rhannu gwaith celf a chyflawniadau gyda chynulleidfa ehangach.