Oedolion
Rydyn ni’n credu nad oes raid i chi byth roi’r gorau i dyfu a dysgu, waeth beth fo’ch oedran.
Trosolwg
Rydym yn darparu cyfleoedd i bobl o bob oed.
Mae ein gwaith gydag oedolion wedi tyfu ac wedi dod yn arbennig o bwysig ers pandemig Covid-19 a’i ganlyniadau. Drwy ymgynghori, roeddem yn gallu nodi bod pobl hŷn yn teimlo’n ynysig ac yn unig a’u bod yn profi lefelau uchel o bryder ac iechyd meddwl gwael yn ystod ac ers y pandemig. Roeddem yn gallu nodi angen ac awydd cryf am weithgareddau ar gyfer pobl hŷn ac ers hynny rydym wedi gwneud hwn yn faes blaenoriaeth i’r mudiad. Ers y pandemig rydym wedi sefydlu gwasanaeth cyfeillio sydd wedi cael effaith gadarnhaol ar ein hoedolion hŷn.
Mae ein rhaglen oedolion hŷn yn cael ei chyflwyno ar draws ein Hybiau Cymunedol a Theuluol hygyrch ac yn darparu ystod groesawgar a chyffrous o weithgareddau cymdeithasol a chreadigol sy’n annog pobl hŷn i ddatblygu rhwydweithiau newydd o ffrindiau ac archwilio diddordebau newydd, gan gynnwys ymgysylltu â’r byd digidol.
Mae gweithgareddau wythnosol yn cynnwys: cerddoriaeth a symud, therapi synhwyraidd, diwrnodau lles, boreau coffi, bingo cymunedol, gweu a sgwrs, cwiltio, dosbarthiadau celf, grwpiau cyfeillgarwch, celf a chrefft, cyfleoedd gwirfoddoli a mwy.
Sut Rydym yn Helpu
Rydym yn cefnogi oedolion mewn amrywiaeth o ffyrdd. Mae ein rhaglenni celfyddydau gweledol yn cael eu harwain gan ein Harlunydd Preswyl, ac rydym yn annog cyfranogwyr i ddefnyddio technoleg i gymdeithasu. Mae gennym weithgareddau sy'n ystyriol o ddementia ac, yn bwysicaf oll, rydym yno i wrando.
Rhaglen Celfyddydau Gweledol
Mae Arlunydd Preswyl Plant y Cymoedd yn arwain rhaglen fywiog o gelfyddydau gweledol cymunedol ar gyfer grwpiau o oedolion sy’n cael eu darparu yn ein Hybiau Cymunedol a Theuluol. Mae’r grwpiau hyn yn darparu gofod diogel i oedolion fod yn greadigol, rhoi cynnig ar bethau newydd a datblygu eu rhwydwaith cymdeithasol.
Cynhwysiant Digidol
Yn yr oes fodern, mae cael ansawdd bywyd da yn dibynnu ar allu cyrchu cyfrifiaduron, ffonau clyfar a thabledi. Nid oes gan yr holl oedolion yr ydym yn gweithio gyda nhw fynediad at y rhain. Yn ystod pandemig diweddar Covid-19 roedd yr oedolion hyn yn aml yn ynysig ac yn unig, felly llwyddodd Plant y Cymoedd i sicrhau cyllid i brynu iPads. Roedd oedolion hŷn a bregus yn gallu benthyg iPad a chael hyfforddiant ar sut i’w defnyddio. Creodd hyn rai heriau ond, ar ôl llawer o chwerthin, roedd pawb yn llythrennog-dechnolegol ymhen dim. Roedd y cyfranogwyr yn gallu ymuno mewn gweithgareddau, gwneud ffrindiau newydd a chyfathrebu â’u hwyrion ac aelodau eraill o’r teulu. Mae’r iPads hyn yn dal i fod ar gael i’w benthyca heddiw, gan wneud cysylltedd yn haws i’r oedolion rydyn ni’n eu cefnogi. Yn ein Canolfan yn Rhydyfelin, rydym wedi lansio prosiect realiti rhithwir (VR) ar gyfer ein hoedolion yn ddiweddar, y gwelir bod iddo fanteision iechyd profedig.
"
Uchafbwynt fy wythnosau yw'r grwpiau celf, maen nhw'n rhywbeth i edrych ymlaen at bob wythnos.
Aelod o un o’n grwpiau celf.
